絲絲講場：領匯勁升良心作怪
有留意開領匯（00823）嘅投資者都知道佢今年基金價格升咗唔少，除咗因為喺現市況下，好多人都想搵收息嘅工具之外，絲絲最近就知道一個消息，可能都同佢最近做好有關，就係三月中嘅時候，領匯獲納入富時社會責任指數系列（FTSE4Good Index Series）嘅成分股。
納入社會責任指數
以前獲納入呢個指數系列嘅公司，包括有港鐵（00066）、希慎（00014）同埋港交所（00388）。叫得做社會責任指數，入選條件當然唔可以淨係市值大、成交量大咁簡單啦。最首要條件係唔可以從事賭、煙草、武器製造、核能發電等形象較為負面嘅行業，仲要符合一大堆國際認可嘅標準，包括環保、人權、反貪，以及對公司持份者、社會有正面影響等等。無可否認依家領匯商場係光鮮咗，但如果你問公屋居民或者小商舖，相信個結果會好唔同囉！
「良心基金」或已捧場
絲絲問過基金界人士，話領匯入選，對股價短期有正面幫助，因為一啲外國嘅宗教基金，好多時都會追蹤呢類「良心指數」，但領匯三月中入選至依家，相信要入貨嘅基金經已做晒嘢，而且呢類「良心基金」數目唔多，小投資者依家先至跟基金追入可能已經太遲。
余詩韻