國美電器（00493）近年大力發展網上電商業務，舊年先將國美商城同巴庫網兩大電商平台整合，尋日就傳出國美在線行政總裁韓德鵬提出請辭。國美發言人同絲絲證實咗呢個消息，話韓德鵬係因為個人身體欠佳而提出離職。
韓德鵬加入國美已經有七至八年時間，當年有份負責搭建國美電商平台，經歷咗國美在線由最初只得6個人到依家2,000幾人嘅發展過程，可以話係國美電商嘅重要人物之一。但有市場消息就話，呢兩年高節奏嘅工作令到佢身體嚴重透支，依家需要好好哋休息。
發言人就話，韓德鵬提出請辭之後已經做緊工作交接，至於由咩人嚟接任呢？發言人就講，暫時會由國美集團高級副總裁、國美在線董事長牟貴先擔任，仲話韓德鵬離職唔會對國美在線造成影響。
近日，中國聯通（00762）公布母公司聯通集團增持公司嘅A股股份嘅同時，有報道就話國美主席張大中亦都持有聯通A股股份7,824萬股，佔總股本的0.37%，成為第五大流通股股東。有市場人士就估張大中喺3.1元（人民幣‧下同）至3.8元之間增持股份，動用嘅資金大約2.7億元，不過就未知佢嘅投資目的。
余詩韻