唔同人對「年輕有為」呢個詞都有不同定義，不過絲絲相信以下幾位人士絕對有資格成為年輕有為嘅其中一分子。財經雜誌《福布斯》最近整理咗一份「全球最年輕億萬富豪」名單，榜上有名嘅都係四十歲以下、身家超過十億美元嘅企業家。
排第一、二位嘅係facebook創辦人莫斯科維茨（Dustin Moskovitz）同朱克伯格，佢哋分別擁有38億美元同133億美元身家。其實facebook咁成功，兩位創辦人上榜一啲都唔奇；絲絲最奇怪嘅係，點解朱克伯格嘅身家明明多啲，但就要排第二呢？
原來因為呢個係「最年輕」富豪榜，排名係跟年齡排，莫斯科維茨細過朱克伯格八日，即係年輕啲啦，所以攞第一名，朱仔惟有做阿二。
除咗外國嘅企業家，中國亦有代表上榜o架。好似坐擁57億美元身家嘅碧桂園（02007）大股東、亦即係創辦人楊國強嘅千金楊惠妍就排第六，自從○七年收到爸爸轉贈嘅股份後，佢就開始躋身各大富豪榜，更憑31歲芳齡成為世界最年輕富豪之一。
另外，出名識得將投資「轉虧為盈」嘅方大集團董事局主席方偉亦榜上有名，佢嘅身家有15億美元，名下嘅方大集團都做得有聲有色，依家喺全國十多個省市已經有超過三萬名員工。
余詩韻