期指觀瀾：好友似乎未收夠籌
美國就業數據優於預期，帶動港股昨日裂口高開，期指以22,888點開出，隨即見過全日高位22,909點後，大部分時間陷於橫行尋找即市支持。
大戶試圖測試好友底線，分別在早市及午後推低期指去到22,751及22,722點，但大部分時間，即月期指在22,750至22,879點百多點內上落，期指收報22,761點，較合理值高水15點，主板成交519億元，係過去四個交易日以來最少。
上周提到，港股近日選擇性地漠視內地經濟數據麻麻的影響，挾淡倉味道甚濃，昨日升市成交之低，證明推測無錯。觀乎港匯轉強，或者好友未必在四月月結之後隨即鳴金收兵，尤其恒指升穿22,527點扭轉一浪低於一浪的形態後，較大的考驗在23,262點，這735點的途程內，重要阻力位唔多，市況較有利好友挾上。
穩陣的期指客可以等回吐出現再買，否則若控制注碼在平時入市三分之一「晒士」左右，揸過市並無不可，尤其過去幾日所見，唔過市選擇即市追升的成功率實在唔高。
剛提到A股有底背馳的情況，重上10日及20日線的滬綜指，昨再升25點收報2,231點，今日如果能夠升穿2,240點，將突破二月中延伸調整浪的下跌通道頂部。
John Mullen