嘩！係人都知，依家喺香港廣東道、甚至歐洲掃名牌，內地人至係「大戶」，于正人喺歐洲畀內地人話係「大戶」，都算係「經典」！可唔可以話係為港爭光呢呵？
計埋匯率平過香港
絲絲即刻問于正人究竟佢哋掃咗幾多貨？疊單有幾厚？退咗幾多錢稅等？佢就支吾以對，只係笑笑口話疊單有幾十張呢！佢自己主要買咗幾對鞋同衫等，太太就梗係有買「包包」（手袋）。佢哋兩公婆無掛住自己o架，仲有買手信畀親朋戚友！
其實佢哋唔止齋shopping，真係有計過數o架，于正人分析話，雖然兌換貨幣時個差價係幾闊，同埋有手續費，但計落都係平過喺香港買。佢做得金融呢行，梗識計數啦！