稅務局上年稅收創歷年新高，總稅收有2,422億元，比上年多咗2%或38億元。不過，雖然政府稅收多咗，但原來初步計算，舊年唔少藍籌企業CEO都要減人工﹗講到減薪幅度最大嘅板塊，就非內銀、內險同資源股莫屬！當中減得最多嗰位，就係華潤電力（00836）最高薪嘅董事局副主席張沈文，舊年人工比前年大減61%，由897萬減到得番347萬元。
而內銀股管理層嘅減薪幅度雖然唔係藍籌股之中最高，但係主要嘅四大內銀當中，「中、農、工」三大內銀嘅董事去年薪酬都有調整﹗
中行（03988）前任董事長肖鋼人工可謂減得最多，由前年186.6萬元（人民幣‧下同），減至舊年110.3萬元，減幅超過四成﹗原來肖鋼喺一一年時人工原本預算只係106.2萬元，但收到一二年報時先發覺佢喺一一年時有一筆額外嘅酌情獎金80萬，結果先至由升變跌！
工行（01398）董事長兼執行董事姜建清去年總薪酬就有113.6萬元，按年減少23萬元，跌幅達17%。
不過，凡事都有例外，好似東亞銀行（00023）去年度嘅業績雖然認真麻麻，不過主席兼行政總裁李國寶仍然照樣加人工，舊年總酬金增加兩成至3,900萬元，當中酌情花紅更勁加39%至2,090萬元添！