有時一心真係唔可以幾用o架，好似孭住渣打集團（02888）、英國國寶級奢侈品牌嘅Burberry同埋信貸資料處理機構Experian三間公司嘅主席三個位嘅莊貝思，正正就因為可能真係太忙嘅關係，佢近排終於同Experian講bye bye，專心做好其他職務咁話喎。
事緣莊貝思呢輪唔知係咪本身黑仔關係，早排竟然開口夾着脷咁，講錯嘢激嬲咗美國司法部，要收番言論同公開道歉。之後，就開始有人懷疑佢貴人事忙，搞唔搞得掂三間公司。好似Experian公司十大股東之一嘅人士，就直情無面畀，串爆莊貝思已經百足咁多爪o架啦，仲要搞到上埋頭條添。
其實好似莊貝思咁嘅金融界領袖，做多幾間公司高層都應該無問題，最弊就係佢做啱以上嘅三間公司，都係英國最TOP嗰幾間，各自喺本身嘅行業都屬前列公司、跨國大企業，淨係應酬都有排佢忙，唔同一般公司掛個名，年年白逗份酬金咁輕鬆o架！
之不過，三大公司各自畀莊貝思嘅人工，都算幾和味o架，舊年佢老兄喺Experian同Burberry就分別袋走37.4萬英鎊同35萬英鎊，喺渣打仲爽，contract上面寫明話一個禮拜返三日工，全年就可以拎走115萬英鎊。佢老兄逗晒三份人工，夾埋就高達187.4萬英鎊，即係約莫2,262萬港元咁上下。
雖然莊貝思家陣已決定咗同Experian分手，但莊貝思話佢會留任到出年七月，直至搵到新舵手為止。
余詩韻