期指觀瀾：好淡角力伺機入市
中國官方同滙豐編製的中國PMI數據都雙雙差過分析員預期，港股的五日連升也告一段落，假期前已提出連升之後，仲要賭埋假期間的數據實在博唔過，結果啱咗一半，另一半係估唔到個市調整壓力咁溫和，昨日恒指下跌68點，報22,668點，相比之前五日的931點升幅，濕濕碎，沽空佔大市成交比例由假期前9.56%回升至11.13%。
以恒指短期由21,423點升至22,862點，0.236回吐支持位在22,522點，與四月三日高位22,527點十分接近，港股破22,527點之後，確認扭轉一浪低於一浪形勢，突破短短四日之後會否再度失守？昨日指數即市見22,552點掉頭回升，估計好友都唔想這個重要防線咁快得而復失。
昨日即月期指高低位在早市已出現，午後在22,524至22,596點之間悶到收市，再睇A股復市成交同樣比假期前大幅減少，整個中港市況膠着的情況明顯，筆者認為在22,500至22,600點之間的尷尬位，沽與揸機會均等。
滬綜指昨日見過2,161點，穿了早兩星期造出的五個月新低，收市拗腰跌3點，9日RSI呈現底背馳情況，或者待港股破一破22,527點，看看淡友有幾大能耐，部署再開好倉。
John Mullen