Market Insight：電訊設備股鑊氣漸濃

一個星期前，聯儲局主席伯南克表示將缺席今年八月全球央行行長在懷俄明州Jackson Hole舉行的年會，觀察家認為係暗示明年一月，唔再尋求連任聯儲局主席的預告，估計「伯蛇」唔打算為放水善後。奇怪華爾街股市對消息出奇平靜，之後幾日仲可以創歷史新高。

睇見議息聲明後，美國十年債息碌落1.64厘創今年新低，若非升息的狼來了故事，經已難以取信於債商，就係股市已經睇死短期聯儲局放水容易收水難，減少買債得個講字，面對經濟及就業市場打極補針都谷唔起，美國政府連環QE後，財政不平衡問題持續惡化，同時股債市泡沫愈吹愈漲，趁早搵過份工嘅伯南克，都咪話唔早着先鞭。

古勝冇點你

萬里長空

環球放水易收水難

中國官方及滙豐編製的四月份製造業採購經理指數（PMI）先後曝光，分別比市場估計低一個百分點，見50.6及50.4，比三月份數字50.9及51.6進一步回落，儘管連續七個月企穩在擴張界線50樓上，但復甦力度唔強，製造業活動確係未見明顯起色，首季內地GDP7.7%增長，當中政府開支及房地產投資佔比例甚高，反之消費內需持續放緩，推動經濟增長的失衡情況仲未有改善。

美國次按風暴引發金融海嘯，轉眼五年，當日放水目的係推動經濟及改善就業，最終谷錯隔離，旺了股債樓市，內地放水放得更古怪，只能谷起房地產，消費及企業投資持續低迷，近日人行掉頭收水免得通脹再惡化，中美都想搵針對經濟的「鏢靶藥」，不過世界邊有咁完美，都係醫得頭嚟腳又痛。至於歐洲嗰邊，昨晚歐洲央行宣布減息0.25厘，期望改善歐元區疲弱的經濟情況同通脹。

海爾電器未見真章

港股假期後復市，受內地數據唔好影響，終止了五日連升的氣勢，恒指跌68點收報22,668點，主板成交562億元，沽空佔比由9.56%反彈到11.13%，升跌股份比例42比58，是過去六日以來至差。

昨日話要繼續睇實家電股，特別提到今年家電股中，以海爾電器（01169）最落後，結果昨日TCL多媒體（01070）、海信科龍（00921）及創維數碼（00751）再創新高，海爾卻微跌0.6%收市，海爾以三四線城市銷售渠道最強，幾隻家電股中，估計最能夠受惠於城鎮化，古勝信心未有動搖，繼續等佢破14.32元雙頂等派彩。

中移（00941）及工信部先後放風，話下半年會有4G服務登場，相關電訊設備股炒到飛起，內地傳媒指內地政府可能揀五月十七日，「世界電訊日」時正式發出營運牌照，未來兩星期，估計電訊設備股可能到達第一個高峰。

手機生產商先跑出

今年真係唔能夠唔認黑仔，有睇開本欄都知，古勝話今年應該沽空中移買電訊設備股，睇番四月初至今，幾隻設備及手機生產商，TCL通訊（02618）升53%、中國無線（02369）升31%，偏偏覺得四平八穩的京信通信（02342）及中興通訊（00763），得5.7%及1.2%升幅，又一次捉到鹿唔識脫角，睇啱板塊揀錯股，尤其睇到內地新聞預測，中移的200億元人民幣TD-LTE招標中，手機只佔採購額低於一成，點解TCL通訊及中國無線升成咁，在下都想問吓佢哋嘅股東。

　　姑勿論點，假如中移真係要在全國150個城市，建設20萬個基站，實在無理由唔睇番設備股龍頭中興，其首季業績賺2.05億元人民幣，按年升36%，業績重點係按季毛利率終於見底回升，意味着歐洲的輸錢訂單完成得八八九九，研發費及員工數目經過瘦身後，經營開支開始見頂回落，估計第二季業績會有明顯反彈，下半年隨着4G的訂單到位，股價重返四月低位的機會應微乎其微，14元樓下上車風險有限。

古勝