Market Insight：內險股收益改善

受惠於內地首季股市氣氛好轉，最近幾間內險股業績後走勢唔錯，中國太保（02601）之後，輪到中國人壽（02628）出成績表，首季純利大漲79%至101億元人民幣，遠勝市場預期，主要多得投資收益率改善，資產減值損失由高峰回落。然而，更能反映保險公司營運情況的保費收入，期內僅1,119.2億元人民幣，按年跌2%，上周五國壽股價可以升1.4%收報20.9元，講到底係大孖沙預期過分悲觀所致，其實業績真係唔可以稱為理想。

業務暫缺乏催化劑

國壽業績大反彈，關鍵係首季投資收益按年上升37.2%，達260億元人民幣，資產減值損失大幅減少89%，由去年同期的76.8億元回落至8.47億元人民幣，總投資收益率5.82%。

古勝無點你

萬里長空

由於去年第二季基數都仲係好低，按年數字繼續大升唔出奇，由第一季數字，估計第二季，即中期業績的新業務價值（VNB）可能只有低增長甚至同去年相若，估值係平，但業務營運方面缺乏催化劑，短期最多係技術反彈，好難轉勢，要揀保險股，友邦（01299）依然秤高多少。

中國每年2,000萬個新生嬰兒，市民消費力近年跟住經濟不斷膨脹，加埋一孩政策有放寬趨勢，繼手袋、紅酒之後，同胞在全球搶購嬰兒奶粉情況愈來愈嚴重，英德澳紐先後推出限奶令，限制出口保障國人利益，唯獨香港，政黨及商界施壓近日促請撤銷限奶令的呼聲斷升溫。

統計話，一歲以下新嬰兒每個月平均消耗3罐奶粉，換句話，本地需求一年大約1,400萬罐左右，去年進口奶粉超過4,900萬罐，意味超過三分之二奶粉來自非本地需求，相信唔少去了大陸，代理對限奶令緊張之餘，計落避過增值稅的水貨，亦都係數以億元計。

奶粉股大升有難度

如果以每個嬰兒每個月要3罐，內地一年需求超過3億罐，多過本港進口量6倍，可以估計再多螞蟻去搬，都無可能統統經過羅湖北上，始終大部分內地用家都仲係要留守本地，通過內地渠道購買。

值得留意是，嬰兒奶粉市場的消費忠誠度極高，內地十大奶粉品牌長期手握八成五以上市佔率，個個父母都為囝囡健康着想，近兩年的十大品牌，唔係「來路貨」，就係內地知名品牌卻標榜百分百海外奶原的洋奶粉，伊利同蒙牛乳業（02319）本來做得唔錯，不過嬰兒奶粉收入比例始終有限。

近半年，股價持續做好的合生元（01112）及雅士利（01230）算係四平八穩，財政也比較健康，唯一問題，兩隻股票估值唔平，往績市盈率28.1倍及17.5倍，一二年業績勁升，多少因為一○年及一一年業績基數比較低，今年綜合大行估計盈利增長26%及17%，除非被睇中收購，否則升勢可能唔及過去大半年的速度，可揸但加注真係要諗諗。

瑞信撐本地地產股

一手住宅物業銷售新例今日生效，上周五本地地產股普遍逆市偏軟，其中信置（00083）跌2.5%。不過，大行瑞信就話，雖然若要維持去年的一手住宅銷售額，以今年發展商最多可售1.6萬個一手住宅單位計，意味樓價可能要跌19%，但該行同時強調，投資者不應只着眼於樓價，因為單是樓價因素不足以左右地產股股價表現，對於推動售樓收入，一手樓的銷售量顯得同樣重要，在預期五月中開始一手樓銷量回升之下，貨如輪轉將更有效提升資產回報，故相信地產股可延續近期強勢咁話。

咁講法，話唔定一手樓銷售新例實施之初，正是吸納地產股之時，故不妨留意相關股份承接力，有大股東增持的長實（00001）同恒地（00012）都可視為首選之列。

古勝