絲絲講場：黃集恩轉工不離輪場

荷合「摺埋」 過檔花旗

原本花旗嘅窩輪發言人、花旗環球金融亞洲前認股證銷售部董事許振威（Henry）已確認上周離職。Henry同絲絲講，自己喺金融界都打滾咗13年，係時候休息吓，而離職係個人決定，唔關公司縮減人手事。至於佢依家喺科大教緊財經相關科目，就會繼續。

而接替Henry嘅，消息指係黃集恩。話說今年三月荷合宣布「摺埋」股票衍生部門，絲絲都關心Martin等人嘅去向，點之咁快有好消息。雖然尋日絲絲搵唔到Martin傾幾句，但Martin前同事、荷合股票衍生部助理董事陳佩雯，透露Martin已過檔花旗，可能佢仲要啲時間準備先對外公開。

其實，連同Martin嘅哥哥黃集蔚，今年初返港由蘇皇轉職凱基證券，黃氏兩兄弟都要適應新嘅工作環境，絲絲在此祝願佢哋事業可以更上一層樓。