絲絲講場：永隆龍舟隊出師得利

端午節係個幾月後嘅事，但永隆銀行一班員工已為嚟緊嘅龍舟賽積極備戰，身為康樂會會長嘅存款部主管龔志明更全程打氣，最後佢哋嘅龍舟隊亦無令人失望，喺上個禮拜嘅熱身賽勇奪兩獎，真係可喜可賀！

龔生同絲絲講，其實佢哋支龍舟隊係臥虎藏龍o架，隊員嚟自銀行唔同部門，雖然支龍舟隊舊年先成立，但佢哋已經好勤力，一個禮拜練習一次，而且成績都唔錯o架。

好似舊年咁，第一次參賽，就喺南丫小龍大賞賽拎獎，而上個禮拜，更加喺「淺水灣小龍競賽」連攞兩獎，都咪話唔威水！

其實扒龍舟好講團隊精神，佢哋支龍舟隊男女隊員都有，就更加講求合作。而龔生仲同絲絲講，為咗再接再厲，佢哋已報名參加嚟緊端午節、七一同中秋節嘅比賽，仲叫絲絲如果有時間，都過去支持吓打吓氣呢！

佢哋康樂組入面仲有支足球隊，之前亦參加過田徑比賽。見佢哋做咁多運動，平時做嘢真係人都精神啲！

余詩韻