絲絲講場：恒隆陳碧華回加享福

絲絲好友告知，Prudence將於七月離開恒隆，不過佢今次離任唔係因為有人挖角或轉行，據知將會返加拿大與家人共享天倫樂。

老公游說 決定辭職

Prudence原名係陳碧鏵，一一年加盟恒隆時，一併改埋名，唔要「鏵」，改用「華」字。加入地產界都係佢嘅新嘗試，估唔到過檔「新」公司得年幾，咁快就決定離任，絲絲聽到消息時，都覺得有啲意外，但恒隆老友已確認佢離職，即係堅喇。

不過據絲絲嘅好友告知，Prudence今次決定離任，其實係「愛妻號」老公多年游說嘅結果，難怪恒隆主席陳啟宗即使唔捨得，最終都接納佢嘅辭任決定。

「萬能老倌」行行皆通

一般人對於陳碧華印象較深嘅，相信係當年因八達通轉售會員資料引發嘅風波，Prudence當時係任行政總裁，備受各方批評。

撇開呢件事件，Prudence其實係本港企業界有名嘅「萬能老倌」之一，佢早年活躍於電訊界，曾任香港電訊與數碼通（00315）嘅高層，及後轉戰金融界，曾出任Visa嘅港澳區總經理，加入恒隆前又曾任TVB嘅國際業務總經理，係本港少數先後涉足電訊、金融、媒體以至地產行業嘅管理人。