絲絲講場:黑石「私募」獎學金送清華

黑石(Blackstone)識賺錢就無人唔知啦,但最近黑石主席施瓦茨曼(Stephen Schwarzman)竟然私人捐咗1億美元(約7.8億港元)出嚟畀清華,搞個目標係籌集3億美元嘅獎學金項目,希望每年幫助二百名主要來自美國嘅學生,去中國留學。

其實,中國近年喺世界舞台愈見重要,唔單止啲投資者同商家要畀面,一啲外國學生都自發地學習中文。無他嘅,無非都係謀定個後路,第時去中國搵食都方便啲吖嘛。

作為私募股權投資先驅之一嘅黑石,又點會唔明呢個道理呢。所以,佢哋個主席就「自發地」捐咗1億美元出嚟,畀清華大學啟動一個叫「清華-蘇世民學者項目」嘅獎學金項目,呢個項目顧問委員會雲集唔少政經猛人,美國國前務卿基辛格及一眾國際知名人士均為委員會成員。

主席捐7.8億贏口碑

絲絲仲聽講,依家喺內地「搵食」,向清華、北大捐款已成為贏取中國政府好感,同埋獲得媒體正面宣傳嘅標準手段。撞啱黑石依家正準備加快中國嘅投資,特別係房地產投資,今次捐7.8億畀清華,可謂「一舉兩得」啦。