最近，絲絲喺網上見到美國研究機構Glaucus Research（格勞克斯研究）嘅報告點名批評紐交所上市嘅中國房產訊息網站搜房網（SFUN），話搜房已經變咗「炒房」！
格勞克斯研究喺報告入面，話搜房網近年嚟喺華爾街、曼哈頓同埋海南三度分別買咗辦公室、豪宅同埋酒店，質疑搜房網真正目的係用上市公司嘅資金炒樓！
絲絲睇過份報告，提出對搜房網嘅三大指控。第一就係搜房網喺一一年嗰陣，用咗超過6,000萬美元，買咗華爾街72號嘅AIG大樓！公司就話呢一棟大樓，係要用嚟做員工培訓。不過格勞克斯研究就話，搜房網只不過係一間中國嘅互聯網公司，點解係7,000英里以外嘅地方，起一個員工培訓中心呢？何況搜房買大樓至今已經20個月仲係空置喺度！
第二個指控就係，一一年搜房網仲喺曼哈頓近郊買咗一棟別墅，價值650萬美元。搜房網主席兩公婆透過其成立嘅一個慈善基金買入，但奇就奇在咁大筆數目，竟然無喺公司嘅帳目度出現。格勞克斯研究仲查到，呢個慈善基金成立到依家，都好似無做過慈善項目呀！
而最後一個指控就係搜房網唔單止喺美國買樓買地，仲係海南島收購咗間酒店呀！加埋喺美國嘅投資，搜房網已經用咗超過8,000萬美元，但係公司好似仲未夠咁，仲打算係上海、北京等地繼續買樓買地喎！搜房網就話，咁樣做係因為需要地方用嚟做員工培訓喎！
誰是誰非依家都仲未知，但係搜房網就回應話雖然報告嘅資訊冇準確咁反映事實，但都好歡迎外界意見喎！