英國馬莎百貨今年一月撬咗出名內衣品牌Victoria's Secret（VS）嘅愛將Janie Schaffer過檔，大家都滿心歡喜，以為Schaffer會有一番大作為，寄望佢可以扭轉馬莎最近麻麻哋嘅業績。點知，佢先至返得三個月工，上星期就突然間要「劈炮唔撈」。
Schaffer來頭好駕勢，之前喺Victoria's Secret內衣及美容部擔任首席創意總監，掌管所有品牌衣服、內衣同美容業務，又建立自家內衣品牌Knickerbox，喺內衣界個朵響噹噹。
Schaffer之所以閃電辭職，原來背後有段古仔。絲絲聽人講，佢喺馬莎返工唔多開心，因為佢要負責埋好多營運、公司財務嘅工作，多過參與產品設計過程，返工返到無晒癮。又有人話，Schaffer嫌馬莎作風守舊老套，既然留低都冇咩發揮機會，正所謂勉強無幸福，倒不如快快趣趣走人喇。
不過，馬莎內衣業務佔公司女性服裝成三分一嘅銷售額，又佔英國市場嘅四分一，突然被Schaffer「起飛腳」，睇怕馬莎都要盡快搵番個人填補空缺喇，但計絲絲話，馬莎最緊要搵到個適應到馬莎公司內部文化嘅人，方為上計。