有邊個比各國中央銀行更有權威？梗係屋企裏面嘅中央銀行啦！相信絲絲老友中銀信用卡總經理蘇誠信（Dickson）一定會有同感。
事關尋日佢同傳媒朋友茶敍，被問到薪酬水平嗰陣，Dickson就好生鬼咁答：「我哋集團嘅花紅你就要問和總（中銀香港（02388）總裁和廣北），至於我嘅花紅就要問我太太喇，因為佢已經將筆數入晒帳。」哈哈，原來有老婆大人把關！
今年以嚟環球經濟充斥不明朗因素，對Dickson嘅信用卡生意有無影響呢？
佢就向大家派定心丸，根據佢嘅經驗，即使外圍經濟有幾波動都好，對香港人嘅消費習慣影響都好有限，除非本港經濟出現重大嘅負面因素，搞到失業率上升，唔係嘅話，業務變化都唔會好大咁話喎，睇嚟香港人嘅消費文化，真係根深蒂固喇。
中港跨境業務繼續係Dickson今年嘅重點業務，佢話希望為本港信用卡客戶提供到內地簽帳嘅優惠，咁下次絲絲北上shopping都要帶埋張中銀卡先得囉。
余詩韻