Market Insight：優質內房選擇吸納

波士頓爆炸事件對股市影響果然短暫，經過周一急跌，周二華爾街股市已經企穩，道指升157點，相當於周一下跌點數六成。反而港股獨自沉淪，二月初至今的長期積弱情況幾時扭轉？

回顧亞洲股市，香港及中國股市真係難兄難弟，年初至今累積跌4.8%及3.3%，相比「黑田Put」刺激的日股28.7%累積升幅，簡直係天堂同地獄寫照，尤其是港股，將去年十一月中21,098至23,944點的升浪，已經將83%升幅跌番晒出街（滬綜指係都只51%）。

放大圖片

放大圖片

內地經濟未宜看淡

內地首季經濟數據差到極，昨日提過電力消耗數字跌到近四年最細增幅，就算再樂觀，唔多唔少都怕中國經濟增長神話會暫且告一段落。不過，半杯水理論，水可以看成半滿或半空，第一季經濟基數因為春節及兩會等因素，出奇地低，樂觀看第二、三季有更大反彈空間。

或者中資股今個月未必有太多利好消息支持，國企首季業績大行都不抱厚望，大市可能在四月尾、五月初進一步試低位，不過，經歷二、三月的大幅修正，估計跌勢將有所放緩，尤其首季中國GDP曝光後，近兩日A股跌幅已經相對溫和。

值得留意，過去三日跌市，跌勢頗集中商品及油、金股，反而唔少二三線股低位沽壓明顯收斂，大市上升股票比例，由周一兩成八，周二四成三，回升至昨日四成八，成分股終極一跌，或者意味港股距離今次浪底經已不遠。

券商股調整近尾聲

收市後A股掛牌的光大証券公布首季成績表，淨利潤按年勁升57.7%，比大行估計為好，揸住四成九股權的光大控股（00165），昨日已見偷步升2.8%，中段一度重返10日線11.6元樓市，可惜尾市港股散晒，收報11.52元已經相當唔錯。

睇番另外兩隻本地掛牌內地券商，中信証券（06030）同海通證券（06837）預期市帳率只係1.5倍及1.25倍，以12至14%股本回報，經過近一季調整，再跌空間應該十分有限，光証季績好或許起牽頭作用，不妨留意。另一個拒絕再跌板塊係內房，自從「國五條」由傳聞變為事實，內房股反而紛紛反彈。而國五條中最辣的是政府限價唔限量，新盤維持一二年定價，意味地產開發商未能進一步抬高售價拉動毛利率改善。

不過同一時間，調控的不明朗因素消除，擁有較多土儲，過往本身毛利率表現優異，有較多商用物業或者三、四線城市住宅項目，反而可以把推盤焦點由「量」方面出發。左揀右揀，富力地產（02777）及世茂房地產（00813）都較合古勝心水，也附合上述條件，睇番兩隻股票由三月低位，分別回升29%及34%之多，無視陰陰乾的跌市。

銷售數據撐家電股

富力三月份銷售額34.3億元人民幣，按年升14.4%，首季累積合約銷售88.8億元人民幣，按年更升33.9%，今年過咗四分之一，完成了調高後全年420億元人民幣銷售目標的21.1%，可見管理層確係自視頗高。四月初推薦過，股價累積升幅唔算多，13至14元仲係唔錯的上車價位。

家電股在跌市之中是近期另一走勢偏強的板塊，創維數碼（00751）及海信科龍（00921）昨日雙雙創年內新高，而TCL多媒體（01070）逆市升2.7%。創維及TCL最新公布的銷售數據表現強勁，前者上月中國彩電銷量增14%，而一二/一三年度全年則多銷24%，後者首季LCD電視銷量按年增21.5%，至於科龍因發盈喜而支持股價持續呈強。

內地樓市確有回暖迹象，加上國家對家電股的扶持，相信家電股在營運數據理想帶動下，短期仍會吸引資金追捧，繼續跑贏大市，投資者可以逢低跟進。

古勝