絲絲講場：普爾遜避稅有Fund數
歐美國家近年不斷向富人開刀，搞到班大富豪冇鞋挽屐走，「賺錢之神」普爾遜推出咗一個名為Paulson Partners Premium L.P. Fund.嘅投資計劃，邀請有興趣嘅投資者出席發布會。不過奇就奇在，發布會預留咗三分一嘅討論環節，教投資者點樣透過計劃去減低稅額。唔怪得外界有分析話，普爾遜推出嘅新計劃，目的係幫有錢人避稅而唔係賺錢啦！
咁啱得咁蹺，最近傳出普爾遜打算移民去位於加勒比海嘅波多黎各，皆因該國係出名嘅避稅天堂，最近通過新法例，調低有錢人要畀嘅利得稅！
否認移民波多黎各
呢個消息，再加埋佢將推出嘅新基金，令移民一事好似言之鑿鑿。
普爾遜就「嗱嗱聲」否認移民嘅講法，佢話自己唔會拎波多黎各嘅永久居留權，淨係會喺當地度假，仲話會考慮喺當地投資房地產咁話。
余詩韻