絲絲講場：花旗午飯熄燈 慳電撐環保

絲絲問過花旗集團香港及澳門區行長盧韋柏，佢大爆一到午膳時間，office就會自動熄燈一小時慳吓電，至於雙面印刷、所有香港職員齊齊電子化，登記使用電子月結單呢啲基本嘢，就更加唔使講啦！

垃圾分類 員工行多步

聽講以前花旗就興用一個大垃圾桶裝晒所有垃圾，由清潔姐姐處理，近年就變成清潔姐姐只係處理可recycle嘅垃圾，一樣係分廢紙、膠類廢物、鐵罐。

咁唔可以recycle嗰啲呢？好簡單，每個員工都有一個迷你版熊人形垃圾桶，而且要自己行去倒垃圾，雖然係麻煩啲，不過員工都願意「行多步」，為環保付出多一分力，真係值得學習呀！

業務貫徹 幫風電融資

做咁多工夫，有冇成效？睇數據最實際，舊年集團所排放嘅溫室氣體比○五年大幅減少13.6%，仲超越咗集團訂下截至一一年底減少10%嘅目標呀！咁好成績，抵佢哋拎到彭博嘅全球最環保銀行獎！

喺生意層面，佢哋都好支持新能源嘅發展，最近就為美國一間風力發電廠提供融資，據講，呢間發電廠由去年五月開始，產生嘅電力足以供應4.4萬戶家庭。

余詩韻