絲絲講場：康宏王利民北極圓夢
康宏理財（01019）嘅「極地狂奔」唔係得個講字，佢哋一行八人終於完成賽事，自言「跑數同跑步一樣咁叻」嘅主席王利民（Quincy）喺第五圈時雖然出現手腳冰冷無知覺，但經半小時休息後堅持繼續賽事，最終以7小時4分完成，成功達成賽前定下8小時內完成嘅目標，亦係香港隊中第二最佳成績。
Quincy喺出發前話要去冰房操練，但始終同實際環境有差距，搞到中途出咗少少意外，好彩都完成咗，僅僅輸畀隊員魏華星！
佢哋喺今個月五日已飛抵挪威首都奧斯陸，翌日即起程前往北極圈極北位置朗伊爾城（Longyearbyen），以適應當地氣溫及爭取時間作訓練。經過兩天嘅訓練，眾人均表示雖然已因應當地氣溫作好心理、生理以及裝備嘅準備，但仍感不足，除手腳發僵外，喺凹凸不平嘅雪地上跑步亦難以發力。
目睹冰川融化誓環保
喺本港時間尋日清晨6點半左右開始比賽，當時氣溫只有零下二十八度。經過今次賽事之後，Quincy仲話除咗實現夢想外，更加睇到冰川融化嘅情況，深深感受到全球暖化問題嘅嚴重性，仲話返嚟後要多啲參與環保工作咁喎！