現時喺耶魯大學任教金融詐騙歷史嘅錢隆斯（Jim Chanos） 因揭發美國能源交易商安龍（Enron）造假而為人熟悉。錢隆斯最近接受訪問，分享佢睇穿詐騙案嘅心得，絲絲一於話你知佢嘅一對法眼到底係點煉成嘅！
錢隆斯係美國最出名嘅short seller之一，佢就好似一個金融偵探咁，專門揭露一啲表面宣稱財政穩健，背後其實做大數或者參與不法行為嘅公司，睇穿佢哋騙人嘅伎倆！佢話坊間有好多唔同嘅工具能夠睇出呢啲詐術，好似Bedford's law咁，以觀察會計上嘅數字同重複嘅模式搵出端倪。
另外，亦可以從七個道德淪陷嘅徵兆中逐一拆解企業嘅面具，譬如董事局中成員有裙帶關係，好明顯就有問題啦！不過亦有公司會用做好事嚟掩飾佢哋嘅惡行，錢隆斯話一個有趣嘅現象係有時最過分嘅詐騙案，係發生喺一啲經常做慈善嘅企業身上，以做善事作掩飾！
而講到金融詐騙最常發生嘅時候，就係出現大牛市後嘅一段時間，因為大部分人喺升市時都唔會對企業有所懷疑，而呢個人人賺錢嘅時候，就係企業賣出有問題嘅項目同投資產品畀投資者嘅最佳時機！就連投資者嘅心理都畀佢看穿，絲絲都要跟佢學吓嘢先得！