Market Insight：醫藥板塊抗跌力強

先講美股，依然強到無倫，隔晚道指低開再以全日最高位收市，古勝講過美股業績期係升多過跌，公司及證券行先調低盈利預測，到派成績表時又會好過預期。美股連升半年都未需要喘氣，但下月調整壓力將會增加，提高債務上限談判或係調整藉口。

內地三月CPI預測係2.5%，揭盅得2.1%，令人大跌眼鏡。不過，數據低雖然代表中央可以在無通脹憂慮下放鬆銀根，但人行自春節後幾乎日日進行正回購，依家差不多冇人再提減息或減存備率（RRR），如果因為CPI低而炒放水未免表錯情。但另一方面，通脹低亦代表消費品加價會遇到較少阻力，對企業盈利會有幫助，而近期多個城市已經召開燃氣加價聽證會。

放大圖片

放大圖片

炒日股忌過度亢奮

四月CPI因肉價受禽流感影響而難免再跌，連中國CPI都係得2%左右，美國同日本以2%以上為通脹目標，似乎路途遙遠，尤其日本到現在仍然係通縮，而日圓呢半年已跌咗近兩成，學唔少專家話齋，如果印銀紙呢招可解決問題，每個國家鬥印銀紙就唔使咁煩惱。

日圓最低跌到99.65，但日經昨微跌收市，匯跌股升呢個定律是否已經打破？日經喺二○○○年曾經升過上兩萬點，但只係曇花一現，現在的日本樣樣衰過十年前，所以炒日股唔好高興得太早。

昨日好多股仔都報復性反彈，通常反彈首日可以很容易以低殘股作目標，所以煤炭股亦有人吼。睇番估值，兗州煤業（01171）一二年PE6.2倍、息率4.59%，但綜合大行預測一三年預測PE升到12.6倍；中國神華（01088）一二年PE8.9倍、息率4.3%，一三年預測PE同息率分別仍有9.3倍及4.2%，邊隻抵買唔使多講。

「五強」各有不同賣點

講完殘股，再講強股，電力股、燃氣股、頁岩氣股、醫藥股同手機設備股可謂「五強」，揀啱板塊更勝於揀啱股票，前三者屬於能源類別，煤炭之失也成為其他能源之得。

醫藥股長線增長、短線有疫症，而手機設備股唔使問都知係食正智能手機潮流，起碼旺多一、兩年，中國無線（02369）、瑞聲科技（02018）、舜宇光學（02382）、富士高（00927）及嘉瑞（00822）有大有細任君選擇，信利國際（00732）半年升咗3倍幾仲搞埋分拆，但分拆地點選擇在A股，原本A股有800幾間公司排隊上市，但唔少等得太耐及受刁難已打退堂鼓，現在仍有超過600間在排隊。

H7N9疫情為醫藥股帶來炒作誘因，內地A股呢期炒完疫苗股又炒口罩股，但呢啲都係投機性居多，多少企業能真正從中得益成疑。其實在港股，醫藥股中不乏有基本因素支持的實力股，撇除季節性流感疫情因素，中長線亦值得投資者考慮。

好似前名中國製藥嘅石藥集團（01093），自完成收購母公司成藥業務及更名後，年初股價升穿2.5元阻力後頭也不回，反覆向上，昨日更以52周新高3.7收市，升6.3%，成交6,545萬元。

石藥估值有望提升

其實石藥早已發現原料藥市場的周期性令公司盈利表現波動太大，且市場為內地數大藥商壟斷毛利率受擠壓，加上歐、美反傾銷行動亦令內地廠商冇覺好瞓，所以呢幾年致力開拓成藥業務，已見一定規模，去年末季完成新收購母公司成藥業務交易，日後成藥業務佔總收入嘅比例將會明顯上升。

如今石藥已由一隻原料藥股變身成兼營成藥業務的醫藥股，增長前景可測性同穩定性都得到提升，有助拉升估值，亦唔排除日後可再獲母公司注資壯大成藥業務，難怪股價表現硬淨，料可繼續跑贏大市！

古勝