近年有「國家隊」背景投行比較喜歡用可換股債券（CB）嚟投資，主要原因唔使講梗係「進可攻、退可守」，由條款以至息口都好似好過用股票入股。起碼最少有事都可以補得住飯碗。以中投公司為例，一一年四月以2.5億美元買入中芯國際（00981）一批CB，同月又以9,000萬美元認購旭光高新材料（00067）另一批CB。證明Prof. J 觀察正確。
近排，中國油氣（00702）宣布向東方資產管理發行2.75億元的CB，為期三年，票面利率為2厘，而行使價0.167元，較之前收市價有溢價19%。東方資產管理係一九九九年經國務院及人民銀行批准成立，由財政部出資，唔使講梗係國家隊啦！去年撥備前的純利達60億元人民幣，資產淨超過300億元人民幣，實力非凡！
如果全面行使，東方資產管理會持有公司11%股權，成為單一大股東，合乎Prof. J嘅CB投資法則之一。即使唔行使亦都可以通過息口獲利。不過，中國油氣上年由於要做大額撥備而虧蝕到1億元，而流動負債淨額逾4.1億元。入股為股權又唔係太似樣，炒作概念由頭到尾都係同中石油（00857）合作發展山西煤層氣項目。由於中石油並無煤層氣業務上市旗艦，而中國油氣係呢方面唯一合作夥伴。
博佢收購咁話，講係咁講咋，國家隊精英確係醒，票面息率2厘，揸足3年，埋單10厘，仲有行使價因供股10%可以下調，負債比率過咗70%當違約，條件極嚴峻都肯受，合乎Prof. J嘅CB投資法則之二。真係唔好以為國家隊係流！沉默確係唔等於懦弱。繼續追蹤，出發！
香港大學電子金融服務榮譽助理教授 徐燦傑