有咩生意除咗要賺錢，仲以服務社會為前提呢？之唔係社企囉！星展香港真係唔話得，撥款200萬元成立咗個社企優化基金，尋日絲絲喺支票頒贈儀式上面見到老友，就係星展香港企業及機構銀行總監張建生（Alex），佢話雖然該行對社企有「特別優待」，但為社企提供銀行服務嘅時候，都要睇番社企本身嘅商業情況o架。
呢個基金目的係支援社企拓展業務，今次有12間社企獲得資助，包括咗僱用少數族裔人士嘅翻譯機構、聘用殘疾人士嘅烘焙工房等等，筆撥款幫唔幫到忙？到咗年底就會揭曉，因為到時獲資助嘅社企要交報告，大家密切留意佢哋嘅成績表喇。
咁難得見到Alex，絲絲梗係關心吓佢嘅業務消息啦！佢話第一季企業銀行嘅表現稍勝預期，生意量接近原定雙位數增長嘅目標，其中跨境人民幣業務有大幅度增長，仲話人民幣產品好受歡迎；至於前海方面，就仲同緊幾間機構洽談，唔知幾時會有好消息呢？