絲絲相信，一名員工嘅價值除咗反映喺佢嘅人工之外，當有公司挖角時，老闆願意畀幾多錢挽留佢，都係另一個「重要指標」。
好似互聯網廣告界奇才Neal Mohan咁，前兩年Twitter想由Google挖佢過檔幫手，聽聞開嘅條件都唔錯，不過始終吸引唔到佢，原來皆因Google開出一個更吸引嘅條件留佢，就係市值1億美元（約7.8億港元）嘅Google股票！咁樣計嚟，Mohan嘅身價咪仲比NBA籃球明星安東尼當年簽約時所收嘅6,500萬美元更多？Mohan到底有咩過人之處呢？
Mohan大學畢業後，好快就加入一間企業軟件銷售公司，接觸有關電腦同互聯網嘅生意。○五年Mohan攻讀MBA後，獲邀加入互聯網廣告公司DoubleClick參與業務改革，當時佢已經預視到廣告市場嘅趨勢將會走向互聯網，所以就同拍檔銳意帶領公司向呢個方向發展。結果不出一年半，DoubleClick就畀Google以31億美元收購，而Mohan亦順勢加入Google，成為IT界炙手可熱嘅廣告人才。
絲絲就好奇，Mohan點解唔自立門戶，自己做CEO咪仲歎！原來Mohan一早就睇透，佢話依家已經感覺似CEO，但又唔使做埋CEO嗰份，即係唔使戰戰兢兢咁，驚住隨時有鑊要孭，所以好滿意咁話。