長實（00001）及和黃（00013）之前公布嘅去年業績使投資市場喜出望外，一眾管理層嘅努力當然受到肯定。長實及和黃新發出嘅年報顯示，長實及和黃董事去年嘅平均加薪幅度分別為8.48%同埋7.15%。
至於同時出任長實及和黃副主席嘅李澤鉅，以兩家公司所獲嘅薪酬總計，加薪幅度雖達9.8%，不過以實收嘅人工嚟計，李澤鉅嘅年薪仍然未及佢嘅愛將、和黃董事總經理霍建寧。
霍建寧早已係公認嘅香港上市公司打工皇帝，按年報披露霍建寧去年獲和黃加薪5.26%，而實收人工則較一一年上升咗897.55萬元至1.79億元，亦即係話霍生嘅人工，隨時比得上個別上市公司嘅全年盈利，以佢嘅加薪金額，自然亦係和黃董事局之冠啦！
而作為老闆嘅李澤鉅，由於一直都喺長和系內多家公司身兼數職，佢嘅人工當然亦要分別由長實、和黃、長建（01038）等公司分擔。
絲絲就粗略幫佢計過，李澤鉅喺長和系去年實收嘅董事薪酬約有1.31億元，同一一年比較人工就多咗約1,100萬元左右。
至於長實及和黃主席嘅李嘉誠，唔使絲絲多講大家都會知道，佢每年均只會向長實董事局收取5,000元董事袍金，所以董事就會加人工，但主席其實無份嘅。