絲絲成日聽人話北望神州機會處處，好多後生仔都躍躍欲試，但民行（01988）前行長、依家喺麥肯錫度做亞太區資深顧問嘅王浵世就認為，年輕人不如先吸收多啲人生經驗，再上去闖都未遲。
人稱「王師傅」嘅王浵世同絲絲講，中港兩地文化有唔少差異，好似喺內地就要成日應酬，所以後生仔搵工，不如先喺香港儲多啲經驗，準備好先上去。
咁大學畢業之後第一份工最好應該係點o架呢？王師傅就話，佢後生嗰時會揀大公司，因為準時出糧，而且大公司好多方面都比較完善，但依家可能時代唔同，搵工最好揀份工作性質可以充實到自己，對將來事業發展有幫助。
其實王師傅除咗係「中國通」，熟悉內地之外，佢文采亦都唔錯o架，久唔久就會執筆寫吓書，絲絲都係佢「粉絲」嚟o架！好似之前嘅《北上管理的藝術》同埋《香港‧上海‧滙豐故事》咁，睇完之後真係會識多好多嘢。
尋日王師傅就同絲絲講，依家埋頭寫緊第四本中文書，因為之前幾本書target啲無咁後生嘅朋友，所以嚟緊呢本書會young啲，同內地嘅後生仔探討吓向海外發展嘅嘢咁話喎。至於幾時有得賣，佢就話要賣個關子喎！
余詩韻