期指觀瀾：忍手等待終極一跌
雖然話港股唔升就跌，呢句說話聽落了無新意，但唔到你唔信，今浪大市跌落21,975點低位後，多日反彈都受制於22,500點附近，到上周五，藉內地禽流感疫情惡化，淡友乘勢反擊，恒指一跌就610點，跌幅2.7%，可謂冠絕亞股。
在大跌市前，將揸了近兩個月的22,185點好倉平掉，仲有200多點落袋，真係執番身彩，刻下最難抉擇的，反而是按弱勢追淡抑或再維持之前策略，在大超賣時博反彈。事關無人知道，遠遠跑輸外圍的港股，會否逢三進一，來一次強勁技術反彈。上周五，大市沽空比例維持在12.5%的七個月高位，即使來一個300至500點的突襲式挾淡倉亦唔意外。
超賣嘅恒指，已跌至近21,400至21,700點的中期支持區，回顧上周五美國公布的上月就業數據麻麻，道指收市跌幅卻大為收窄，估計今日港股最多低開50至100點左右。
不過，今日適逢夜市開鑼，過夜盤小注無妨，賭得大就無謂。由上周五表現，面前最大風險是當香港確診第一宗H7N9後，或可能引發終極一跌，忍得手的，可以等果日來臨，不過，如果細注兼有能力分注的，市底其實已有條件一試，以不多於四分之一注碼，入市試買。
John Mullen