Market Insight：風高浪急 宜靠邊站

自從伯南克將息口同就業市場表現掛鈎，猶如向華爾街施了不跌魔咒，數據好，市場憧憬經濟穩步復甦；數據唔好，意味聯儲局每個月850億美元的買債量寬仲有排玩落去。上周五就業數據一出，十年美債息跌落1.71厘今年新低，當晚道指由即市最多跌171點，縮窄至收市僅跌40點。

日本央行確認提前推量寬，迷失廿年之後，今次的確抱住不成功便成仁的決心，沽日圓買日股已成為第二季投機客新主題，加埋美股，雙雙成為全球吸金力最強股市。

放大圖片

放大圖片

其實，港股估值雖然唔講得特別吸引，但基本因素亦唔係太差，無奈有流通量卻苦無故仔可炒，成了基金的Funding market，齊沽港股班錢返美日市場炒賣。

上周五港股一瀉如注，跌穿22,000點心理關口，急跌超過600點，成為全球最弱股市之一。從當日五大沽空股票中有三隻係A股ETF，可見投資者已預計今日A股復市要跌，加埋南、北韓局勢緊張，內地疫情未明，相信本周本地魚缸繼續風高浪急，恒指再落較大支持睇250日線21,076點。

此外，若有留意上周五主板沽空比例12.5%，乃七個月高位。似乎如今淡友正等候香港確認首宗進口疫症出現，來個終極一跌，看官們想買貨不妨畀啲耐性。

做空A股值博率低

首季大企業已陸續公布去年度業績，根據上周二瑞信發表嘅亞太策略研究報告顯示，截至三月二十九日止，在亞太區市場中，以一二年往績市盈率計，中國市場的估值最平，僅10.5倍，其次係南韓的11.6倍，香港則為17.7倍，可見對比之下，正如上文所講，港股估值唔算得特別吸引。

再睇一三年預測市盈率，中國僅9.2倍，低於過去五年平均的11倍；香港則為15.1倍，與過去五年平均的14.9倍相若。睇完呢啲數據，得出嘅結論係現時A股估值比港股吸引。

純從估值角度出發，也許現水平大戶再加注做空中國市場的值博率唔太吸引。雖然最近疫情消息確令中資股估值受壓，但今時今日政府在處理疫情的手法比十年前具效率，人民的防疫和保健意識亦加強，暫時毋須因疫情因素而自亂陣腳，且觀望次季國家隊何時出手入市維穩。

美匯更具參考價值

如今投資者可以做的是減少短炒，保留銀彈，留意疫情進展，等候季節性因素淡化，以及市場消化最近中央着手清理影子銀行及調控樓市措施的影響，而A股市場又順利重啟IPO，屆時A股便有望走出低迷局面。

講到近期跌市，有內地傳媒統計，自劇集《大時代》在九二年十月首播，至今嘅二十年期間，港股約有32次因「丁蟹效應」而出現急跌情況，睇見內地傳媒如此「認真」統計只有一笑置之！

事實上，要推測資金何時回流港股，調整浪底部何時出現，留意美匯指數表現顯得更加實際。翻查資料，美匯指數由二月初低位約79水平，回升至本月初高位一度升至83.49，上周五收報82.57，相信季內會維持在82至84水平上落，一旦如去年八月跌穿82而不回頭，預示跌市底部即將出現，屆時籌謀入場分注吸納優質重磅股迎接升市未算遲。

房託基金高位運行

個股方面，仍停留在魚缸的資金，去處不外乎是公用或高息股份，勝在收益相對穩定，股價較具抗跌能力。上周五恒指大跌，見長江基建（01038）、粵海投資（00270）及華電國際（01071）等股份股價逆市靠穩，那些是避險之選可說是一目了然，相信房託基金如領匯（00823）以及置富產業信託（00778），季內基金單位價格，亦有望維持在高位運行。

古勝