政府為了在短時間內增加房屋供應，可以話千方百計，近年大搞限呎限量，無非想增加多啲伙數，因為市民最關心並非每年賣幾多幅地或面積幾大，而是可供應幾多單位。
在今個財政年度，政府講明大晒冷，盡推賣地表內所有地皮，但計埋只可以興建萬三伙多啲，其餘要靠鐵路項目、市區重建及私人發展，先湊夠全年目標，顯然未夠保險，於是諗出新招，先幾日就從賣地表中攞出沙田九肚三幅地皮，擴大地積比率及放寬高度限制，擺明用大面積來篤夠數。
地積比率是決定可建單位數量的關鍵，計法就是可建樓面面積與地皮面積的比率，數字愈高，樓面愈多，可建多些單位。好似其中一幅九肚地皮，地積比率由原來0.9倍，一口氣擴大到2.1倍，可建單位數量來個double都得。不過，要水到渠成，還要放寬高度限制配合，否則地積比率大咗，又唔准起高啲，份圖則不知怎畫，所以三幅地皮都一齊「增高」。
其實，擴大地積比率及放寬高限，無大不了，市場早有聲音要求咁做，尤其是市區地皮，既可增加供應，又能盡用土地潛力。不過，咁樣會令居住密度提高，可能又會多番屏風樓、遮擋山脊線，肯定會遇到反對，諮詢及更改規劃有排搞。
所以King Sir心中有個疑問，點解政府賣地表內的地皮話改就改，有無做壞規矩，變成只許州官放火、不許百姓點燈呢！好簡單，規劃應該全個區來睇，同區一早賣咗但未開工嘅地，是否可要求一視同仁，一齊放寬呢？肯定無政府咁容易。結果同隔籬原本一樣起咁高，忽然變成矮過人，條數點計？愈諗就愈多疑問。
政府不久前已在將軍澳的地皮中，用過放寬地積比率呢一招，當時還以為屬個別情況，現在重施故技，相信已變成慣常做法，總之要篤夠、篤大個數。
ECON King Sir