Market Insight：內房股要精挑細選

市場預期聯儲局今、明兩年會陸續撤出貨幣寬鬆措施，在伯南克將量寬同失業率掛鈎之後，每個月就業數據都變成量寬退市溫度計，其實ADP數據有十幾萬個新增職位一啲都唔算差，只係同經濟師預期需要每月20萬份新工，至可以推動經濟復甦的預期有些少落差。

而反映長期息口去向的十年美債孳息率，在數據公布之後跌到接近1.8厘水平，今晚官方嘅就業數據出籠，暫時大行估失業率維持7.7%不變，新增職位由二月的24.6萬份縮番些少至20萬份，開大開細都未知，今日港股復市相信會繼續靜局。

放大圖片

放大圖片

日本央行經過兩日會議後，新任總裁黑田東彥確認提前推非常規措施以振興經濟，包括無限量資產購買計劃及買入更長期的國債，簡單講即係步歐美央行後塵，叫印銀紙工人加班，實行水浸經濟。

日央行步歐美後塵

消息一出，圓匯兌各主要貨幣跌得七個一皮，美匯則走強，大致在市場估計之內，最古靈精怪嘅係傳統受惠通脹重臨同經濟復甦的商品，好似金、油、銅價齊齊插水。QE1、2之後，QE3開始量寬推唔郁金、油價，估計一來係環球基金將更多籌碼放番落風險資產，甚至學伯南克所講，認同量寬得嚟又可以保持低通脹。

特別留意銅價，近期唔少大孖沙將銅價走勢同全球最大消費國中國的經濟盛衰掛鈎。事實上，近半年銅價兩次轉角位，分別在去年十一月初及今年二月初出現，都早過A股轉角位幾日。銅價大插插，執筆時每噸隊穿7,400美元，穿埋舊年十一月底位，直逼去年六月的7,219美元，係咪意味短期A股殊途同歸？

近日資金流顯示，確實有唔少基金捨棄東北亞及中港股市，流番去美股及日股。無可否認，相比正在收緊水、無振興故事配合的中港股市，華爾街、日本橋兜町又確係吸引啲啲，只有等大孖沙飲飽食醉，返嚟至有得搞。

醫藥板塊快上快落

星期三外圍大升下，港股又一次高開低收，恒指收市跌30點，報22,337點，睇番由三月中的低位22,000點樓下，反彈九日只係得區區三百幾點，再睇星期二、三沽空比例，升番去12.4%及12.5%，是去年八月底以來最高，可見港股明顯已經淪為基金提款機。

H7N9來犯，保健醫藥股表現標青，泰凌醫藥（01011）上升17.6%，朗生醫藥（00503）及復旦張江（08231）都升約7%，不過，依家連傳染途徑同將來會唔會生產疫苗都仲未確定，炒作小心會快上快落。

內地多個城市的調控樓市「國五條」細則陸續曝光，暫時投行反應都認為係雷聲大雨點小，主要係招數無預期咁辣。假期見內地媒體報道，北京非周末睇樓量比落實出招前仲多，由於「國五條」賣樓將差額20%作為所得稅，唔少換樓客索性唔睇二手樓，轉向較高價的新樓市場，實行貴買貴賣。

事實上，唔少內房股一月初比大市更早見頂回落，累積足夠調整，近日反而趁「國五條」水落石出，炒番轉頭。

富力目標訂得進取

富力地產（02777）屬於比較強勢內房股，由三月中低位回升逾兩成，一來早前公布業績對辦，即使去年平均售價下滑，但藉着出色的成本控制，毛利率只係輕微由42.5%跌至42.2%之下，全年實際協議銷售升13%至322億元人民幣，推動全年純利有13.6%增長，賺55.02億元人民幣。

近期唔少基金睇好富力，一來管理層對今年銷售目標訂得頗進取，目標銷售額420億元人民幣，意味會有近三成增長，其次係今年派息比率輕微低於四成，預留近百億元子彈以便在吸納土儲上大展拳腳，啱心水不妨留意。若嫌富力太過「大價」，差唔多故事的碧桂園（02007），都可以望多兩眼。

古勝