十七年嚟順逆皆有
佢哋咁樣畀人講都唔嬲，絲絲都要畀個like佢，有人話，「壹蚊雞」唔單止抵食，仲係一種回憶，話晒由九六年推出以嚟，都成十七年喇，而且從未間斷，即係連金融風暴、金融海嘯佢都經歷過，真係無論順境、逆境都陪伴大家。
都唔知係咁啱，定係心理作用，稻香近幾年一推出招牌「壹蚊雞」，港股就例牌跌，由二○○八年到舊年都有咁嘅情況，最誇張係二○○八年八月，當時稻香賀奧運而推出優惠，殊不知撞正雷曼兄弟引致嘅金融海嘯，股樓跌到阿媽都唔認得。之但係坦白講，嗰時全世界嘅股票都跌，唔通又關雞事咩？咁都入佢數又好似唔太公允噃，無辜當災，真係要擇個吉日先好益街坊喇！