有傳即將與政府「傾掂數」落實捐地創舉嘅「四叔」李兆基，舊年起一直建議大家買地產股好過買樓，最近又一次以身體力行支持，接連三日增持投資旗艦恒地（00012），現時持股量已高達百分之六十二點九六。
根據港交所（00388）股權披露，「四叔」喺公司公布業績後嘅第二日即刻增持，仲一連買咗三日，總股數逾六百五十萬股，平均作價逾五十二元，係「四叔」今年首次大手增持，以尋日收市價計算，淨係呢批增持嘅股份，已經進帳近八百萬元。對上一次「四叔」以市價大手增持，已經要數番舊年八月尾至九月初，當時政府仲未推出加強版ＢＳＤ、「雙辣招」等措施。
睇番恒地股價，由年初近六十元高位一度回落至約四十八元，直至最近先重拾升軌，莫非「四叔」覺得恒地已經見底？
講番「四叔」捐地一事，截至去年底恒地喺新界擁有四千二百八十萬平方呎土地，係最多新界地嘅發展商，公司早前指新界東北農地可以提供三點六萬個單位，部分農地計劃以「市場價」賣畀「四叔」作捐贈用途，不過細節仲有待公布。有分析就認為，除咗助年輕人置業外，對釋放恒地土儲嘅價值亦都有幫助。