中電（00002）自從二月底公布業績之後，主席米高嘉道理幾乎日日增持股份之外，尋日仲有一單惹起不少聯想嘅人事調動，做咗總裁兼首席執行官超過13年嘅包立賢，辭去呢啲職務，由藍凌志接替。
包立賢會加入中電最大股東嘉道理家族嘅私人公司，嘉道理父子有限公司工作，亦都會留任中電非執董。
相信大家對藍凌志嘅名字唔會陌生，佢就係早兩年中華電力加價事件嘅領軍，當時仲引起市民大眾嘅不滿，最後更由已退居幕後嘅副主席阮蘇少湄宣布降低加幅而平息民憤。不過，藍生當年係因家事而離港，並唔係臨陣退縮嘅。
其實藍生嘅資歷就毋庸置疑，佢喺一九九二年加入中電，二○一○年就升咗做中華電力嘅總裁，喺電力行業已經有30年經驗，澳洲、英國同香港嘅業務都有負責，所以呢次人事調動，都證明咗中電對佢嘅一種肯定同埋信心！
中電公布業績後，主席米高嘉道理，幾乎天天增持，買到唔停得手，計埋啱啱公布，喺三月最後一個交易日買嘅貨，計計埋埋買咗1,190萬股，涉資8.38億元。
余詩韻