唔少工業家成功背後都有一個故事，二○一一年上市嘅功能布料同內衣製造商廣豪國際（00844），老細王建陵又係白手興家，佢話佢八十年代嚟到香港，當其時只係住喺一個得120呎嘅地方，佢一個月先搵得千幾蚊人工，老婆出去炸薯條返到屋企仲喊，所以話依家啲後生，肯捱吓嘅總會有出頭天。
雖然王總係個南京人，不過佢嚟咗香港都成廿六年，廣東話都相當好，雖然係搞工業，不過絲絲覺得王總見識非常廣，去過好多地方。
不過，佢就話，雖然去過咁多地方，但佢都係覺得香港做生意係最好，只可惜係成本太高。依家公司喺山東設廠，王總話，訂單情況好理想，今年計劃用3,000萬去擴大面料同成衣嘅產能，分別30至50%同10至20%。
講番廣豪個業績，王總話，舊年因為接多咗單返嚟，所以要增加外判加工，加上人工成本升，但公司又無加價，所以令到個毛利率跌咗六個百分點。
不過CFO李彥昇話，依家經濟唔太好，加唔加到價都好難講，不過公司第日發展將會集中喺功能性面料上面，推出唔同產品，議價空間多啲，又會做多啲歐洲客，希望可以爭取番多啲毛利率，維持喺舊年個水平啦！
余詩韻