中銀香港（02388）去年業績比預期理想，總裁和廣北就話員工嘅花紅加咗少少，不過原來佢自己嘅整體酬金就得1,193.6萬元，按年少咗2.17%，主要係因為花紅按年大減16.79%。
和廣北話花紅係「敏感問題」，只係講咗句，隨住業績提升，花紅金額肯定會上升番喎！聽講，去年員工嘅花紅會略微增加，但和廣北話唔希望同事有過高嘅預期，因為每個人嘅花紅都唔一樣！睇番財務報表，佢自己嘅花紅反而按年大減16.79%，至402.4萬元，計埋其他津貼、袍金等等，最後實收1,193.6萬元。
如果話花紅係「敏感問題」，「任期」可能都好敏感，中銀香港董事長肖鋼早前調任中證監主席，正式離開中銀香港，唔知和廣北又會唔會好快同絲絲講再見？佢就話唔評論任期問題，不過，就再三強調中銀香港嘅制度唔會因個別人事變動而有所影響。
除咗花紅，絲絲比較關注中銀香港會唔會派特別息，但係和總就話上市十周年已係上年嘅事，依家唔可以作出任何補償喎！
余詩韻