嚟緊嘅四月廿四日，就係港交所（00388）舉行股東周年大會嘅大日子，非執行董事夏佳理將功成身退。咁啱得咁橋，一年一度嘅賽馬盛事「港交所盃」安排咗喺四月十四日舉行。
一向係賽馬發燒友，兼且做過香港賽馬會主席嘅夏佳理，唔知到時會唔會出席呢？若果到時現身，就會係最後一次以港交所非執董身份出席，佢唔知會唔會特別投入，下注都多啲呢？無論如何，賽馬都係做善事嘅，絲絲總希望夏佳理有所斬獲！
夏佳理○六年起出任港交所主席，去年開始轉做非執行董事，喺港交所服務長達七年，同港交所上下早已打成一片，卸任在即，唔知港交所有冇特別表示或者有答謝活動呢？
喺絲絲查探下，發現原來舊年當夏佳理退下冇做主席嘅時候，港交所已經搞咗一次答謝活動，當時港交所仲一併答謝埋於舊年退任嘅非執董史美倫同鄭慕智。
聽聞當時港交所仲送咗一份禮物畀夏佳理添。
咁又係，夏佳理在任七年間，不斷南征北討，周圍飛去幫港交所拉客，引進海外公司嚟香港上市，差不多飛咗大半個地球，絕對有心有力。
不過，近日因為意大利徵收金融交易稅，本港經紀買賣普拉達（01913）時都唔知向客戶收好唔收好，搞到非常迷惘，而且擔心未來續有其他海外國家徵收，故希望港交所同政府盡快解決。呢段「小插曲」可能夏佳理當初都始料不及！
余詩韻