Market Insight：食品股估值偏高

其後主席先生知道失言，同日出來澄清，塞浦路斯屬於獨立個案，其他歐豬會有度身訂造方案，可是，隔晚歐元隊到四個月低位1.2827至肯停，反映揸住「信佢一成雙目失明」宗旨做人的，仲係市場多數，尤其美國經濟復甦勢頭日趨明顯，歐元區一池死水，短期歐元向着1.225至1.25美元方向進發的機會唔細。

今年歐美市場唔少有雙位數升幅，港股原地踏步不特止，國指仲見緊紅，隨住愈來愈近第一季季結，多多少少會吸引到捧落後嘅基金買嘢，隔晚美股高位回落，昨日A股一度跌近2%，恒指先跌後回升，有59點進帳，收報22,311點，重返10日移動平均線樓上。

放大圖片

放大圖片

下月股市或有轉機

三月恒指累積跌緊3.1%或709點，本來三月業績期後市況往往轉淡，今年會唔會例外？睇內地政經形勢，兩會後有穩定落嚟迹象，無疑中國的股市及經濟周期，下一波似乎向上，而唔係向下，加埋日本央行四月好可能開始無限量寬，留意到近兩日港匯出現異動，開始轉強，四月實在唔應該睇得太淡。

高估值股份，分析員揸實放大鏡去睇業績，一旦有乜差池，殺傷力可以好大！記得月初，古勝已提過要小心內地食品股，事實估值已經好高，炒落機會高過炒上，事實中國旺旺（00151）份業績已反映原材料成本下降的好處，今年應該好難再咁明顯，業績後抽升一日之後，股價在11.5元水平升唔上跌唔落。

同樣是基金鍾愛的食品股統一企業（00220），就無咁好彩，昨日中午出業績，去年賺8.56億元人民幣，升1.7倍，股價大跌14.7%，收報8.59元，幾乎一次過將今年升幅清袋。

國美業務翻身需時

統一業績比大行估計的9.03億元低5.2%，不過應該唔係隊到開巷主因，一如同業，期內毛利率由29.1%升至34.6%，是○九年以來最高，不過和上半年只係持平，未有進一步拓闊，但期內銷售推廣及行政開支升幅40.7%及31.7%，均高於同期銷售額增長26.4%，如果毛利率見頂的話，今年增長有可能放緩到20%左右，跌完後以家陣29倍市盈率，感覺仲係有啲貴。

一早預期業績見紅的國美電器（00493），蝕5.96億元（人民幣‧下同），減去上半年虧損5.01億元，下半年蝕少好多，唔夠1億元。相比競爭對手A股蘇寧，去年銷售額尚有4%增長（國美跌20%），少賺44%，國美重整傳統店舖銷售，以及大力投入電子商貿，代價沉重。

數據上，現金、存款及應收帳都有所改善，但可見的日子，內地網購日趨普及，對暫時仲有九成以上銷售由經傳統「電器舖」賣給顧客的國美，負面影響相信仲會持續多一段時間，逆轉故事可賭，但唔適合孤注一擲。

光伏股無貨睇少瓣

唔係個個同胞有能力南下掃奶粉，兩隻內地奶粉股業績對辦，合生元（01112）去年多賺40.9%至7.43億元，周一出業績的雅士利（01230）賺4.69億元升53%，末期息由去年5.68分大幅提升99%至11.31分，現價2.68港元（下同）相當於5.26厘股息。兩股今年累積升75.6%及31.3%，內地微調一孩政策，長遠對中大型奶粉股有利。

早前雅士利見過3.16元高位後，輾轉回落，同新西蘭乾旱奶粉原料價可能上漲有關。女人錢外，父母錢最易賺，相信唔難轉嫁買家，績後企穩，可以再諗上車。

呢期圍繞光伏股的消息時好時壞，令人無所適從，一眾光伏股上周完成反彈，本周又再尋底，興業太陽能（00750）波動最大，昨低見6.2元，最後收報6.36元，下跌13.59%；陽光能源（00757）、卡姆丹克（00712）、保利協鑫（03800）跌幅亦介乎3至6%。

板塊中大部分股份食「彈散」，且低位一次比一次低，走勢唔多對辦，看來短期資金流出光伏股後，冇咁快回頭。若然冇貨喺手，無謂火中取栗；若持貨仍重，宜把握每次反彈減磅。

古勝