絲絲講場：新西蘭旱災BB捱貴奶

不過繼最近爆出毒奶恐慌之後，新西蘭又經歷緊三十年來最大規模旱災，加上中國需求太強勁，新西蘭牛奶出口指標價格今年累積漲咗62%，今個星期仲創埋紀錄新高添，唔通新西蘭媽媽都要跟香港媽媽學番一兩招，早啲周圍撲定奶粉？

奶粉期貨升兩成破頂

究竟旱災點樣影響牛奶價格？睇吓最近一次拍賣就知，全球最大乳製品出口商恒天然集團（Fonterra）喺今個星期最近一次拍賣中，全脂奶粉期貨價格就大升21%，至每噸5,116美元嘅紀錄新高。

荷蘭合作銀行環球乳製品策略師亨特預期，中國一月份牛奶入口按年大增70%，但係新西蘭旱災嚴重，今季尾牛奶產量按年可能減少15至20%。

亨特仲話，雖然歐美係牛奶供應上可以自給自足，但係國際牛奶價格上升，一樣會拉高當地批發價格，零售價格都有上升壓力，只係食品商眼見依家嘅環球經濟情況，難啲轉嫁畀消費者咁解咋。

奶粉需求有增無減，就算出現奶粉荒，都無阻奶粉生產商賺錢，好似美國同本港上市嘅奶粉股最近幾乎全線跑贏大市添呀！

余詩韻