聯想控股董事長柳傳志出名係一名工作狂，絲絲一路都以為佢應該係事業大過天，抽唔到好多時間擺喺屋企。但柳傳志囡囡柳青接受《中國企業家》雜誌專訪，講咗好多同爸爸相處嘅點滴，原來喺囡囡心目中，柳傳志係一個非常關心屋企嘅爸爸，仲係囡囡嘅人生導師添。
平日有少少Cool嘅柳傳志，原來喺屋企都真係一個嚴父。柳青話晒都係太子女，但佢同好多富二代唔同，畢業之後並冇繼承父母嘅生意、財富，全因為柳傳志喺聯想集團定下咗一條天條：子女不得在公司任職，就算只係實習都一律唔得！
所以柳青喺北大讀書嗰時，諗都冇諗過要去聯想實習，反而佢拎到聯想嘅競爭對手康柏公司嘅獎學金，仲去埋人哋公司市場部做暑假實習。
柳青唔靠父蔭，一樣成功發展自己嘅事業，佢就話都係多得爸爸嘅一番話，「要想人前顯貴，就得人後受罪」，激勵佢咬緊牙關，拚命讀書、工作，用實力得到高盛暑假實習嘅機會，再喺高盛投資銀行由一個分析員做起，捱咗11年，今日已經躍升為直接投資部董事總經理，好似佢爸爸柳傳志就算聯想面對逆境，都一路堅持落去咁。
柳青依家除咗係一名成功嘅投資人，仲係三個小朋友嘅媽媽。雖然工作繁重，但佢同爸爸柳傳志一樣好重視家庭，放假嘅時候會盡量推晒啲應酬，留喺屋企好好咁陪老公仔女o架。
余詩韻