孖妹S檔案：國產大Brand錢進攻略

王：國泰君安投資諮詢部分析員王昕媛

彩兒：你身為上海人，一定都希望有中國公司能在未來成為全球最強品牌，唔知你睇好邊隻中國股係一下隻Google（谷歌；GOOG）？

　王：我覺係騰訊（00700）喇！微信目前用戶超過三億人，騰訊嘅業務收入主要從三個方面發展：廣告、移動游戲、移動商務，例如商家可在店內擺放微信嘅二維碼廣告牌，用戶用手機掃描後，即可享受銷售打折等特權，這樣用戶便可和商家產生一對一交流，增加客戶嘅依賴性。另外，騰訊嘅強大QQ用戶網絡，亦有助各種產品之間產生協同作用，有望提升收入來源，目前Bloomberg顯示的分析員所畀嘅最高目標價達到360元，我很看好它呢！（上周五收報274.2元）

聯想重構望變科企巨星

彩兒：近年三星電子（韓股005930）愈做愈強，連蘋果公司（AAPL）都差啲招架不住，你話邊隻中國股可成為科技界明日之星喇？

　王：聯想（00992）應該大有機會啦，雖然該股短期受收購黑莓消息影響，但中長線來看，呢間公司優勢很突出。據IDC（國際資訊公司）稱，去年智能手機出貨量，中國已超越美國，佔全球份額26.5%，而我相信個人電腦、平板電腦、智能手機及智能電視勢將愈來愈流行，還有聯想在分拆Lenovo和Think兩大業務後，也進一步確定公司戰略及資源配置，可見該股嘅升值潛力非同小可。

彩兒：我最鍾意做運動減肥喇，平時着波鞋多過着高跟鞋，中國有無一隻運動用品股可以慢慢追貼Nike（NKE）先？

　王：李寧（02331）啊！ 目前該股嘅營運仍在煎熬之中，但它轉型方向正確，只要通過調整供應鏈，令訂貨模式更為靈活，相信可降低成本同時縮短新貨上市時間。另外，現時它在嘗試做主導型訂貨會，目標就係降低庫存、提高周轉率、逐步解決庫存問題。事實上，現時整個運動行業出現普遍性問題，如產品高庫存、產品同質化、網購衝擊、需求復甦疲弱等。但我相信，若李寧能夠在目標計劃內完成清庫存，同時將盈利虧損縮小，其「一哥」優勢定能再次浮現。

陳：Chartwell Capital投資總監陳惠仁

高妹：能夠被選為全球最強十大品牌，其中不少仲係上市公司，從價值投資出發，呢啲品牌股係咪好抵買？

　陳：作為基金經理，如果面前有兩間公司要選擇去買入，若A公司有品牌，交易價為50蚊；B公司寂寂無聞，交易價為40蚊，那我一定會買A公司，原因是「寧買貴，莫買錯」。

李寧安踏錯在唔識「Market」

高妹：十大最強品牌內有接近一半都是美國企業，我以為美國佬開機印銀紙就叻啫，原來佢哋搞品牌都咁勁！

　陳：美國人最叻就係Market（推銷）自己，所以亦好叻做產品宣傳，佢哋非常識得賣Idea（主意）。以Nike為例，難聽啲講，咪一間做波鞋嘅公司，但佢無廠房、無自己嘅零售店舖，相反佢專注於設計波鞋、宣傳波鞋，賣嘅就係Idea、賣品牌價值。相反，李寧（02331）、安踏（02020）做生做死，內地店舖愈開愈多，但只要中國人個銀包多少少錢，佢哋就會崇洋，轉去買Nike或者Adidas。

高妹：話時話，「品牌」兩隻字真係有啲虛無！

　陳：「品牌」嘅定義係好無形、好難界定的，但佢同「聲譽」嘅意思好相似，因為有聲譽可以等於有信譽。試想想，有個散戶想搵人幫佢做投資，面前一個係星級基金經理，另一個只係無名小卒，咁你話個散戶會信邊個喇？正如我同城中巨富一齊去銀行借筆巨款，銀行都會先借畀巨富喇！每個人都可建立自己嘅品牌、聲譽、信譽，公司亦一樣。但我重申，品牌價值並不完全等於投資價值，投資股票一定要睇基本因素。

高妹：品牌等於信譽！難怪有品牌嘅公司，其出錯或製造壞產品嘅機會率都低啲！

　陳：如果你去到非洲，好口渴想飲水，但又驚衞生問題，你都寧願畀多少少錢買可口可樂飲喇，原因係你相信佢唔會出事。另外，價值投資者會長期持有嘅股份通常都與品牌有關，雖然唔代表投資風險會降低，但其防守性及防跌力一定相對較強，可經歷時間考驗。

十大品牌美股有得炒

雖然投資美股有點隔山買牛，但只要散戶們清楚有關投資事項，炒美股一樣無難度。首先，大家要去銀行或證券行開番個美股或環球股票戶口，記得開戶時填埋W-8BEN（非美國公民身份證明表格）（申報後有效期為三年），作為豁免美國境內資本增值稅之用，但呢份表格就不包括豁免30%之股息稅。

交易時差要留神

另外，香港同美國有時差嘛，所以交易時間亦有不同。一般而言，美股嘅交易時段可分夏令時間（四月至十月底，今年提早於上周日轉夏令）為香港時間晚上9:30至翌日早上4:00；冬令時段（十月底至三月）為晚上10:30至翌日早上5:00。因此，散戶要炒美股，其中條件就係要捱得眼瞓啊！

高妹、彩兒

若有料報畀高妹同彩兒或有嘢問，可電郵money.biz@opg.com.hk