兩會就快閉幕，今屆咁受外界注目係因為呢次十八大首次全體大會，除選出新一任國家領導人外，亦被視作未來五年中國發展戰略嘅風向標。市場普遍預期兩會焦點會落喺金融改革、城鎮化同能源改革方面。Prof. J維持今年策略「炒股唔炒市」，相信喺金融改革方面會着墨較多。
市場普遍都預期中央嚟緊會加大RQFII及QFII額度，擴大人民幣海外市場等。能夠受惠呢啲金融改革措施嘅一定係內地金融機構，尤其是證券商。而且今年仲有啲背景相似嘅大型內地券商準備AH股上市，對於已經上市嘅內地券商股就會有影子效應。
加上最重要係A股已經被忽視咗三年幾，全世界持有最少嘅就係中國股票，所以當投資者要搵一啲低估值嘅市場，好明顯就係中國股票板塊。
數據顯示，過去有一段時間每星期都有資金流入亞洲地區，而中國地區佔大多數，呢個係一個很大嘅推動力，所以Prof. J預期A股會持續復甦，當然，仲要配合投資情緒。
過去嘅三年金融市場有好多憂慮，譬如美國次按爆煲，跟住歐債危機，中國又話經濟硬着陸等，以致大部分投資者都抱避險情緒。不過，今年情況開始改善，外圍環境似乎穩定落嚟，加上大家又預期中國領導上場將有一系列改革出台，都有利股票市場向上。繼續追蹤，出發！
香港大學電子金融服務榮譽助理教授 徐燦傑