一手住宅物業銷售條例下月底正式生效，新地（00016）旗下嘅元朗大盤爾巒，依足新例整好咗份樓書，絲絲可以用「巨無霸」嚟形容呢本說明書，足足有1,500頁，幾乎拍得住嘉能可（00805），破晒紀錄厚1,600頁嘅招股書。
爾巒呢個靚盤單位種類繁多，有洋房、低密度以至中密度各式物業，發展商為滿足新例要求去展示最詳盡資料，每份樓書要分三本去印製，「分體」之後本本都仲成本電話簿咁厚。
就連見慣大場面嘅新地副董事總經理雷霆，都忍唔住話呢本係佢見過有史以來最具分量嘅樓書，佢仲打趣話，由於呢份樓書足足有成1,500頁，所以要畀買家多啲時間充分了解咁話。同區熱銷中嘅尚悅，樓書只係得約120頁，可見爾巒樓書足足係比以前一般樓書增磅超過10倍。
地產建設商會執委會主席梁志堅都話，按住新例要求整嘅樓書，過千頁都唔出奇，但對環保帶來影響，之不過法例落實就一定要執行囉。佢話唔會提出延期，惟部分細節執行上會有困難，稍後會以白紙黑字向局方查詢，希望短期獲回覆。
余詩韻