香港租金高昂已經唔係咩新鮮事，只不過頂唔順貴租嘅，原來已經唔淨止街頭「茶記」或手工藝舖，連一眾食開大茶飯嘅金融界朋友都覺得捱租好吃力！
立法會議員張華峰嘅恒豐證券，下星期一起正式搬到新office營業，絲絲老友Simon（恒豐證券研究部董事林家亨）話，原因咪就係要慳成本囉。
恒豐證券個舖依家喺中環皇后大道中100號，大家都可以估到有幾貴，嚟緊就會搬去皇中39號嘅豐盛創建大廈，Simon同絲絲呻，話業主一租約期滿即刻再加租，惟有搵個平啲嘅位啦，佢話新舊舖嘅平均每呎，差距有成20蚊o架。
絲絲記得，恒豐早十年八載曾經落戶IFC（國金中心），大約五、六年後搬去皇中100號，到依家只係租咗三、四年，Simon話佢係死約加生約咁租，點知生約一滿就加租，所以先搬得咁密。
佢仲話，新寫字樓離舊舖其實先得兩分鐘路程，唔使驚以後放lunch唔方便，不過新寫字樓就會細少少，個舖嘅裝修已經做好九成，今個星期六同日，班伙記就會正式搬嘢入去，相信老闆張華峰已經搞好新寫字樓風水。
余詩韻