兩大台資食品企業發威，舊年齊齊取代咗兩間日資公司嘅亞洲地區一哥地位，躋身零食類同即食麵類嘅「冧巴溫」，相信大家都估到係旺旺（00151）同康師傅（00322）囉！
旺旺搶卡樂B冠軍寶座
市場研究機構Euromonitor公布咗舊年各類食品喺亞洲區嘅排名，甜點、鹹點零食類別，旺旺成功取代「冧莊」四年嘅卡樂B，成為亞太區最大嘅品牌，主要係由於佢改善咗市場策略，令市場佔有率升咗0.8個百分點，去到4.7%，與此同時，卡樂B就跌咗0.4個百分點，得番3.6%，一升一跌之下就換咗位喇。
不過絲絲記得，卡樂B舊年拍住康師傅成立合資，產銷休閒食品，可能因為七月先成立，成效未反映到啩？
即食麵類方面，康師傅K.O.咗港人至愛嘅「清仔」日清，成為亞太區最高市場份額嘅大阿哥，原因就係提升包裝麵銷售等等，所以市佔率升咗成1個百分點，去到13.6%，而清仔就跌到得番12.3%，「四連冠」就咁斷纜。
講真，日清同卡樂B兩大日資大哥嘅市場，好大程度依賴內地，依家墮後莫非係同舊年內地發生抵制日貨嘅事件有關？
余詩韻