Market Insight：銀行地產同樣值博

查實美國次按風暴爆發，全球央行印錢印出癮，操控股市升跌的指揮棒等同落在央行手中。近期中港兩地股市獨弱，數年初至今，滬綜指升得0.05%，恒指仲衰到要跌，反觀美股卻氣勢如虹，道指升10.3%，英國股市都升10.2%，最勁係日股，更升19.1%，大有十年唔發市，一發當三年的味道。

說穿了，中港股市不振，是股市對內地閂水喉有戒心，前日人行行長周小川開腔話寬鬆貨幣政策時期已經結束。

放大圖片

放大圖片

中港股市或追落後

主觀睇，中國新領導上任櫈都未坐得暖，為營造經濟向好，人心所向，立即把貨幣政策轉向的可能性唔大，客觀環境，近日經濟數據顯示，內地經濟唔單只未算大幅度好轉，一、二月復甦力度更有減弱的迹象，經歷寬鬆信貸九個月，仍未境全功，或者人行會為寬鬆調整出口術還可以，但相信唔會急於修正。

再睇日本央行新任行長黑田東彥，即使未登場，市場已對無限量寬充滿憧憬，形成亞洲股市近日跌唔落的局面，昨日，日本及南韓股市雙雙單日轉向，四圍出現資金氾濫，基金經理追貨的情況，三月中旬開始，會係其他股市跟中港股市跌，抑或中港股市追落後反彈，如果要二揀一，古勝估計，後者機會高一線。

中移（00941）業績稍勝預期，去年賺1,293億元（人民幣‧下同），增長2.7%，較市場預期的1,250億至1,260億元高，當中出入主要來自第四季EBITDA利潤率向好，季內盈利359.95億元稍勝預期，按年升6.2%，按季增15.7%。末期息1.778港元，連同中期息全年派3.411港元，盈利派息率43%，以昨日收市價83.35港元計，息率4.09厘。

中移大搞4G做財神

內地4G牌已如箭在弦，中移仲要巴閉到唔用普及的HSPA，要度身訂造，打造「全球獨有」的國產4G制式TD-LTE，由上市的子公司獨資負責，看來已無懸念。

業績中，中移透露今年資本開支1,902億元，比去年1,274億元大幅提高49%，遠高於市場預期，有份分千億大餅的美國Qualcomm（美國代號；qcom）及中興通訊（00763）今次肯定飽到嘔，昨日中興股價抽升8.8%，連帶京信通信（02342）及中國無線（02369）兩股都升8.5%及4.1%，未來幾個月，電訊同設備股之中點揀，睇怕唔使多講喇。

繼滙控（00005）及渣打集團（02888）將新造按揭利率加四分之一厘，昨日連恒生銀行（00011）都宣布加入。銀行加按息，初時在下以為自己聽錯，過去半年政府連番出手壓抑樓市措施，樓市成交萎縮，銀行唔爭生意不特止，仲加息趕客！聽過幾個銀行大班為加息解話，講來講去三幅被，圍繞資金成本上升以及加強風險管理。

加新按息一舉兩得

真係要美國未加香港加先？香港根本資金氾濫，睇番一個月及三個月香港銀行同業拆息，昨日為0.207及0.381厘，年初為0.277及0.398厘，是去年歐債危機後新低，再睇金管局反映銀行資金成本的綜合利率（C Rate），近半年變動唔大，一月份仲微跌至0.28厘，薄仔息就更不在話下，根本冇郁過。

今日要買大價樓或者第二間物業按揭，至多借四至五成，即係樓價要跌一半，銀行先入肉，住宅按揭向來係本地銀行最唔使做又係最賺錢生意，按揭成數去到歷史新低，仲有幾大風險，大家都雞食放光蟲。

講到底，今次加息政治象徵高於一切，本地銀行乘機拉闊息差，仲送埋個順水人情畀嚴打樓價的特區政府，何樂而不為，但到底係穩穩陣陣買番本地銀行，例如中銀香港（02388），抑或趁壞消息出盡博本地地產股反彈，留番畀大家自己決定。

古勝