港交所（00388）將於下個月八號硬推「期貨夜市」，真係有咁啱得咁橋，證券商協會新一屆理事就職典禮竟然撞正「夜期」開波之日！今次係金利豐（01031）老闆娘朱李月華首次擔大旗做主席，證券商協會肯定會大搞就職典禮，場面星光熠熠可以預期，但咁多經紀到時要出席畀面派對，唔知會唔會影響「夜期」首日成交表現呢？
「夜期」成交活唔活躍，大家冇水晶球，真係要到時先知。雖然中小經紀行舉腳反對，但聽聞中資經紀行對「夜期」就好有憧憬，認為佢哋嘅客戶會有興趣玩。有資深經紀行家就同絲絲講，「夜期」平日應該冇乜問題，但大鱷會好陰濕，會等機會嚟一鋪殺啲散戶，所以要打醒十二分精神！
港交所亦都戒備十足，提升市場監控，發現不當交易就會交畀證監會跟進。推出時又實施為期兩個禮拜嘅穩定期，又安排經紀簡介會、測試等，同叫經紀行提交緊急聯絡人名單，無非都係想「夜期」順順利利。
余詩韻