近日美股做好，但中港股市都係缺乏方向。冇計，兩會期間，大家都住抱觀望態度。睇吓啲官員傾到邊個行業嘅政策，資金就去短炒相關股份。雖然依家踏入業績期，但業績股炒味欠奉，成個大市都係呈上落市格局。睇嚟班外資仲觀察緊內地嘅政經局勢，Prof. J相信要到第二季之後先有新部署。
不過，本地薑恒生銀行（00011）嘅業績其實唔差，嚟緊仲有中銀香港（02388）。不嬲中銀香港嘅業務都比較有吸引力，加上股市交投回升、匯市又波動，應該可以帶動中銀今年嘅證券、外匯買賣同基金銷售收入。估計佢嘅非利息收入今次會有較佳增長，甚至達到有雙位數增長。再配合埋母公司中國銀行（03988）同佢嘅人民幣存款池，派息應該都幾可觀。
此外，中銀香港亦都具前海概念。母公司中國銀行喺前海嘅業務基礎最穩固，日後如果前海嘅跨境人民幣貸款進一步增加，中行將會轉介更多客戶畀中銀香港。而隨着香港人民幣資金池持續擴大，中銀嘅人民幣業務收入亦會增加，都咪話唔和味。
而RQFII有新修訂，就係取消外資獲批投資額度在股票、債券的三七限制，日後可悉數投資A股。中銀嘅香港人民幣業務擁有領先優勢，任何促進離岸人民幣業務嘅措施佢都會受惠。今年內地領導層換屆，係咪推動A股投資，對香港同外資而言都十分重要。繼續追蹤，出發！
香港大學電子金融服務榮譽助理教授 徐燦傑