期指觀瀾：挾倉味濃觀望為上
美日股市屢創新高，內地股市卻未能擺脫弱勢，自二月中開始持續調整，筆者上星期選擇跟A股賭，小注做淡，結果周五港股追落後，慘被KO，講真輸得真係唔多服氣。
上周五期指開22,738點，試22,705點低位後，好友採取主動，很快將期指推到23,000點水平，午後再破關，淡友投降盤湧現，期指高見23,193點，即使A股收市再度偏軟，也未見太大調整壓力，收23,102點，比除息後的理論價23,021點，高水81點之多，唔少淡友同筆者一樣，在周五失驚無神的市況下中伏。
睇番上周一的342點跌市，成交828億元，反觀周五恒指升320點，主板成交只得721億元，挾倉味道極濃。尚幸早明言信心只是一般，唔敢全力做淡，以限價盤22,818點作為止蝕，埋單輸百多點。
港股本身欠缺消息，市況勢頭唔明顯，短線炒家好易被大戶挾死。技術上，恒指上周五高位23,220點，曾破50日線23,189點，以及23,944至22,445點跌浪的0.5反彈阻力23,195點，收市縮番落23,091點收，話弱唔弱，但又唔係可以追買。23,026至23,163點的裂口全數補回後，除非企穩23,220點樓上收市才順勢追好倉，否則，先一動不如一靜。
John Mullen